Шығыс Қазақстан облысына жұмыс сапары барысында Мемлекет басшысы “Ольга Рыпакова” жеңіл атлетика орталығының және оның базасында жұмыс істейтін жеңіл атлетикадан олимпиадалық резервтің облыстық мамандандырылған балалар-жасөспірімдер спорт мектебінің (МБЖОРМ) жұмысымен танысты.
Олимпиада чемпионы Ольга Рыпакова Президентке орталықта жыл бойы тұрақты оқу-жаттығу сабақтарын өткізуге барлық жағдай жасалғанын айтты. Мектеп ашылғаннан бері мұнда жеңіл атлетикадан Қазақстанның барлық қысқы чемпионаттары өткізілді. Қазіргі уақытта орталықта республикалық және халықаралық жарыстарда жүлделі орындарға ие болған 713 тәрбиеленуші жаттығуда. 2023 жылы спортшылар мектеп қоржынына 281 медаль алып келді.
Сонымен қатар, Ольга Рыпакова елімізде жеңіл атлетиканы дамыту бойынша бірқатар ұсыныстар айтты. Атап айтқанда, ол өңірде жеңіл атлеттердің оқу-жаттығу жиындарын Алтайдың қолайлы табиғи ортасында емдеу-қалпына келтіру рәсімдерімен ұштастыруға мүмкіндік беретін спорттық медицина орталығын құру маңызды деп санайды.
2015 жылдан бастап Ольга Рыпакованың жүлделеріне арналған турнир өткізіліп келеді. Жарысқа спортшыларға әлемдік рейтингте ұпай жинауға мүмкіндік беретін World Athletics Continental tour деңгейі берілді. Белгілі спортшы осы турнирдің мәртебесін “күміс” деңгейге көтеруді сұрады. Ол үшін манежді қамтуды жаңарту, сондай-ақ жүлде қорының сомасын ұлғайту қажет. Мемлекет басшысы Премьер-Министрдің орынбасары Тамара Дүйсенова мен әкім Ермек Көшербаевқа бұл мәселені бақылауға алуды тапсырды.
Содан кейін Президент спортшылармен сөйлесті. Ол мемлекет спорттық инфрақұрылымды жақсартуға ерекше көңіл бөлетінін атап өтті.
Дереккөз: https://www.akorda.kz/ru/kasym-zhomart-tokaev-posetil-legkoatleticheskiy-centr-olga-rypakova-2615010
